Mörkin lögmannsstofa

Mörkin lögmannsstofa, sem starfar undir heitinu Jonsson & Hall á alþjóðavettvangi, hafði lengi rekið WordPress-vef á law.is. Verkefnið var að endurhanna vefinn frá grunni, koma miklu magni efnis skýrt fyrir á íslensku og ensku og gefa stofunni einfalt kerfi til að halda honum sjálfri við — án þess að eldri slóðir og uppsafnað vægi gamla vefsins glötuðust við skiptin.

Efni stofunnar er umfangsmikið. Á nýja vefnum eru 28 starfssvið flokkuð í fjóra meginflokka og 16 starfsmenn með eigin síður. Starfssvið og starfsfólk eru tengd í báðar áttir: á síðu hvers starfssviðs má sjá hvaða lögmenn sinna því og á starfsmannasíðum má sjá þau svið sem viðkomandi leggur áherslu á. Þannig verður auðveldara að finna rétta þjónustu eða rétta sérfræðinginn, þrátt fyrir umfang vefsins. Vefurinn heldur jafnframt utan um sögu stofunnar, eigendur, viðurkenningar og alþjóðlegt samstarf, auk frétta og almennra upplýsinga.

Ein stærsta áhættan við að skipta út rótgrónum vef er að gamlir tenglar hætti að virka og leitarvélar missi samhengi milli gamla og nýja vefsins. Áður en law.is var fært yfir á nýja vefinn voru 1.158 slóðir af gamla vefnum prófaðar og kortlagðar. Eftir flutninginn var sama próf keyrt aftur gegn raunverulegu léninu. Engar hringvísanir eða tímabundnar tilvísanir fundust og hver eldri slóð leiðir á réttan stað á nýja vefnum.

Efni vefsins er geymt í Sanity og Mörkin hefur eigið ritstjórnarviðmót. Þar getur stofan meðal annars uppfært fréttir og upplýsingar um starfsfólk án þess að þurfa að breyta kóða eða hafa samband vegna hverrar smábreytingar. Hver notandi fær sitt eigið boð og sinn eigin aðgang og breytingar birtast á vefnum yfirleitt innan nokkurra sekúndna frá vistun. Kerfið er jafnframt byggt þannig að breytingar á starfsfólki þurfi ekki að skilja eftir brotna tengla eða gamlar starfsmannasíður sem enda á villu.

Allur vefurinn er til á íslensku og ensku. Íslenska útgáfan er á law.is og enska útgáfan undir /en, þar sem stofan birtist undir alþjóðlega heitinu Jonsson & Hall. Síður á báðum tungumálum eru tengdar saman þannig að notandi getur skipt um tungumál án þess að missa staðsetningu sína innan vefsins. Við afhendingu fékk stofan jafnframt handbók fyrir vefstjórnina með leiðbeiningum um helstu breytingar og daglega umsýslu.

Hönnunin byggir á dökkbláum tónum, hlýhvítum flötum og ljósmyndum af íslensku landslagi og jöklaís. Markmiðið var að halda yfirbragðinu rólegu og faglegu en láta efnið, starfsfólkið og þjónustuna vera í forgrunni.